દોષિતની સજા વિરુદ્ધ સરકારની અરજી ફગાવી, CBIની અપીલનો સ્વીકાર
Kolkata: કોલકાતાના આર.જી કાર રેપ અને મર્ડર કેસમાં નીચલી કોર્ટે આરોપીને આજીવન કેદની સજા ફટકારી હતી. બંગાળ સરકારે આ સજાને મોતમાં બદલવા માટે કોલકાતા હાઈકોર્ટનો સંપર્ક કર્યો હતો. બંગાળ સરકારની માંગ છે કે આરોપીઓને ફાંસીની સજા આપવામાં આવે. કોર્ટે આ અરજી ફગાવી દીધી છે. જ્યારે આરોપીને આજીવન કેદની સજા સંભળાવવામાં આવી ત્યારે મુખ્યમંત્રી અને તૃણમૂલ કોંગ્રેસના સુપ્રિમો મમતા બેનર્જીએ આ નિર્ણય સામે અસંતોષ વ્યક્ત કર્યો હતો. તેની સામે રાજ્ય સરકારે હાઈકોર્ટમાં અરજી કરી હતી. આ કેસમાં કોર્ટે સીબીઆઈની અરજી સ્વીકારી લીધી છે.
કોલકાતા હાઈકોર્ટે શુક્રવારે આરજી કાર હોસ્પિટલ બળાત્કાર-હત્યા કેસમાં દોષિત સંજય રોયને નીચલી અદાલત દ્વારા આપવામાં આવેલી આજીવન કેદની સજાને પડકારતી સેન્ટ્રલ બ્યુરો ઑફ ઈન્વેસ્ટિગેશન (સીબીઆઈ)ની અપીલ સ્વીકારી હતી. સીબીઆઈ અને રાજ્ય સરકાર બંનેએ હાઈકોર્ટમાં રોયને ફાંસીની સજાની વિનંતી કરતી અપીલ દાખલ કરી હતી.
ચુકાદો આપતાં કોર્ટે શું કહ્યું?
સિયાલદહ કોર્ટે પોતાના નિર્ણયમાં કહ્યું હતું કે આ ગુનો સૌથી જઘન્ય અપરાધની શ્રેણીમાં આવતો નથી. જેથી ગુનેગારને મૃત્યુદંડ આપી શકાય. કોલકાતા હાઈકોર્ટે આ કેસ સીબીઆઈને સોંપ્યો હતો. આ કેસમાં, સીબીઆઈએ પૂર્વ આરજી કાર પ્રિન્સિપાલ સંદીપ ઘોષ અને તાલા પોલીસ સ્ટેશનના અધિકારી અભિજીત મંડલની પુરાવાનો નાશ કરવાના કથિત પ્રયાસો માટે ધરપકડ પણ કરી હતી, પરંતુ સમય મર્યાદામાં ચાર્જશીટ દાખલ ન કરતા બંનેને જામીન પર મુક્ત કરવામાં આવ્યા હતા.
આ પણ વાંચો: ગુજરાતમાં ઇન્કમટેક્સનું સર્ચ ઓપરેશન, જામનગરના જાણીતા મીઠાના ઉત્પાદક દેવ સોલ્ટ ઉપર તવાઈ
સુપ્રીમ કોર્ટમાં 17 માર્ચે સુનાવણી થશે
તાલીમાર્થી મહિલા તબીબના માતા-પિતાએ અરજી પર તાત્કાલિક સુનાવણીની માંગ કરી હતી. જોકે કોર્ટે આ અરજી પર તાત્કાલિક સુનાવણી કરવાનો ઇનકાર કરી દીધો હતો. કોર્ટ આ કેસની સુનાવણી 17 માર્ચે જ કરશે. પીડિતાના માતા-પિતા પણ આરોપીને ફાંસીની સજાની માંગ કરી રહ્યા છે.
કોલકાતાની પ્રખ્યાત સરકારી આરજી કાર મેડિકલ કોલેજમાં 9 ઓગસ્ટે એક મહિલા ડોક્ટરનો મૃતદેહ મળી આવ્યો હતો. શરીર પર ગંભીર ઈજાના નિશાન હતા. તેણી પર બળાત્કાર થયો હતો. આ પછી તેની હત્યા કરવામાં આવી હતી. આ કેસમાં કોલકાતા પોલીસે ઘટનાના બીજા દિવસે એક આરોપીની ધરપકડ કરી હતી. આ હૃદયદ્રાવક ઘટના સામે રાજ્ય તેમજ દેશમાં હજુ પણ વિરોધ પ્રદર્શનો થઈ રહ્યા છે.
