મહારાષ્ટ્રમાં 5 ડિસેમ્બરે નવી સરકાર બનશે, BJPના નેતાએ કહ્યું કોણ હશે આગામી મુખ્યમંત્રી?

Maharashtra CM News: મહારાષ્ટ્રમાં નવા મુખ્યમંત્રીના નામને લઈને સસ્પેન્સ હજુ પણ યથાવત છે. પ્રચંડ બહુમતી સાથેની જીત બાદ મહાયુતિ ગઠબંધનમાં મંથન ચાલુ રહ્યું હતું. ભલે હાલ દેવેન્દ્ર ફડણવીસના નામની ચર્ચા થાય, પરંતુ તેમના નામની સત્તાવાર જાહેરાત કરવામાં આવી નથી. ભાજપના એક વરિષ્ઠ નેતાએ આજે દેવેન્દ્ર ફડણવીસને આગામી મુખ્યમંત્રી બનવાની રેસમાં સૌથી આગળ ગણાવ્યા હતા. તેમણે દાવો કર્યો હતો કે મહારાષ્ટ્રમાં 5 ડિસેમ્બરે મહાયુતિ ગઠબંધનની નવી સરકાર બનશે.

હકીકતમાં, 20 નવેમ્બરે યોજાયેલી વિધાનસભાની ચૂંટણીમાં, BJP, એકનાથ શિંદેની શિવસેના અને અજિત પવારની રાષ્ટ્રવાદી કોંગ્રેસ પાર્ટી (NCP)ના મહાગઠબંધનએ 288 માંથી 230 બેઠકો જીતીને સત્તા જાળવી રાખી હતી. ભાજપ 132 બેઠકો જીતીને સૌથી મોટી પાર્ટી તરીકે ઉભરી આવી છે. શિંદેની શિવસેનાને 57 અને એનસીપીને 41 બેઠકોથી સંતોષ માનવો પડ્યો હતો. જો કે 23 નવેમ્બરે ચૂંટણીના પરિણામોની જાહેરાત થયા બાદ પણ આગામી મુખ્યમંત્રીના નામ પર કોઈ નિર્ણય લેવામાં આવ્યો નથી.

મહારાષ્ટ્રના આગામી મુખ્યમંત્રી કોણ હશે?
શિંદે, ફડણવીસ અને પવારે ગુરુવારે મોડી રાત્રે બીજેપી અધ્યક્ષ જેપી નડ્ડા અને કેન્દ્રીય મંત્રી અમિત શાહ સાથે બેઠક કરી હતી. બેઠકમાં આગામી સરકારના મુદ્દે સર્વસંમતિ સાધવાનો પ્રયાસ કરવામાં આવ્યો હતો. શુક્રવારે મળનારી મહાયુતિની મહત્વની બેઠક મુલતવી રાખવામાં આવી હતી. એવું કહેવામાં આવ્યું હતું કે કાર્યકારી મુખ્યમંત્રી એકનાથ શિંદે સતારા જિલ્લામાં તેમના પૈતૃક ગામ જવા રવાના થઈ ગયા છે. હવે રવિવારે મહાયુતિની બેઠક યોજાય તેવી શક્યતા છે.